पुण्यातील गणेश विसर्जन मिरवणूक रंगली २८ तास

महाराष्ट्र जागृती

पुणे, ता. १९: पुणे शहरातील गणेशोत्सव विसर्जन मिरवणुकीला महात्मा फुले मंडई येथील पुतळ्यापासून काल सकाळी १० वाजण्याच्या सुमारास सुरुवात झाली. मानाचा पहिला कसबा गणपतीच्या ढोल-ताशांच्या गजरात आनंददायी सुरुवात झाली. त्यानंतर आज दुपारी ३ वाजता मिरवणुकीची सांगता झाली. ही विसर्जन मिरवणूक तब्बल २८ तास चालली, अशी माहिती पोलिस आयुक्त अमितेशकुमार यांनी पत्रकार परिषदेत दिली.

यावेळी पोलिस सह आयुक्त रंजनकुमार शर्मा, उपायुक्त संदीपसिंह गिल हे उपस्थित होते. यावेळी अमितेशकुमार म्हणाले की, गणेशोत्सव विसर्जन मिरवणुकीकरिता जवळपास आठ हजार अधिकारी, कर्मचारी बंदोबस्तावर होते. त्यामुळे शहरात मोठ्या उत्साहात मिरवणूक पार पडली. सर्व अधिकारी आणि कर्मचारी वर्गाने योग्य नियोजन केल्यामुळे दुपारी ३ वाजेपर्यंत ही मिरवणूक चालली.